Хуулгаазыннар уламчылавышаан
Эльвира Кызыл хоорайда чурттап турар. Ол бир-ле катап далаштыг орук кежип бар чорда, халдып орган машина ону хөме таварып эрте берген.
Орукка медерел чок чыткан Эльвираны дүрген дуза машиназы эң-не берге байдалдыг кемдээн кижилер чыдар эмнелгеге эккелген. Эмчилер үш хондур хүнзедир ооң амы-тыны дээш турушкан түңнелинде, Эльвираның уругларынга оларның иезиниң амы-тынын камгалаарының кордал чогун дыңнаткаш, шуут-ла авазын хөөржүдеринге белеткенирин сүмелээн.
Улуг уруу Аленанага ол медээ аяс хүнде чаңнык дүшкен дег болган. Ооң карактары караңгылап, хөрек-чүрээ сыңышпастап, ыы-сыызын төп, дыка-ла үр ыглап келген. Кым дузалаарыл? Кайнаар, кымче халыыйн? – деп, бодалдар ону дудүвүредип эгелээн. Хенертен ол ыызын тыртып, орталанып келгеш, авазының чоок эжи Бакмаа башкыны сактып келген. Ооң холу ала-чайгаар телефонда-ла барган, орай-дүн-даа Аленаны соксадып шыдаваан. Авазының эжинче долгап, эмчилерниң дыңнадыын дамчыдып, Бурганынга тейлеп, мөргүүрүн дилээн.
Үш-дүн ортузунда удуп чыткан Бакмаа угбай эжиниң дугайында коргунчуг медээ дыңнааш, уйгузу чаштап, Дириг Бурганга бүзүрээн ха-дуңмаларынче ам бо дораан Эльвираның амы-тыны дээш Бурганга мөргүп, тейлээрин телефон-биле дамчыткаш, ийи холун өөрү сунгаш, дис кырынга олура дүжүп, ыглап тура, Бурган Адазындан чалбарып дилээн.
Шак ол өйде медерел чок чыткан Эльвира карактарын көрүп, оңгарлып келген. Ону көрген эмчилер тынмайн барган киживис канчап тынып келди дижип, бот-боттарының аразында кайгап, элдепсинип, айтыржып турганнар.
Эльвираның дирлип келгени чоок кижилеринге хуулгаазын чүүл болган.
«Мээң Адым адап Адамдан чүнү-даа дилээр болзуңарза, Ол силерге бээр. Дилеңер, алыр силер, өөрүшкүңер эгээртинмес долу болур» - деп, Иисус Христос Иоаннаның бижээни Буянныг Медээзиниң 16:23-24 дугаар шүлүктеринде чугаалап турар. Ынчангаш Бурган Ада Бодунуң ажы-төлүнүң бир дем-биле күүсеткен дилээн долузу-биле хандырып, Эльвираның амы-тынын эгидип, эгээртинмес өөрүшкүнү хайырлаан.
Эльвира угбай сегий бергеш, «Улустуң үүлгедиглерин өршээр болзуңарза, Дээрде Адаңар база силерниң үүлгедиглериңерни өршээр» Матфей 6:14 - деп бижээнин номчааш, ону хөме тавараан чолаачыны истеп сүрерин соксаткаш, тоомча чок кадыг сеткилдиг чолаачыны өршээр чаагай сеткилди бээрин Бургандан дилээн.
Оон эгелээш-ле Эльвира угбай Камгалакчы Бурганы-биле сырый харылзаалыг, Аңаа бар-ла шаа-биле бараан болуп чоруур.
Олча ОНДАР.
