Иисус Христос деп кымыл ол? Силер болза Ону кым деп санап турар силер? Бурганның Сөзү Библияда, Ол дугайында чүү дээнин көрүп көрээлиңерем.
Иоанн 14:6 Иисус: "Мен дээрге орук, алыс шын база амыдырал-дыр мен. Чүгле Мени таварты дээрден башка, кым-даа Адамга кээп шыдавас" - деп чугаалаан.
Иоанн 1:29 "Иоанн олче кел чыдар Иисусту көрүп кааш, мынча дээн: «Бо дээрге Бурганның Хураганы - дыр! Ол бо делегейниң улузунуң бачыдын чайладып аппаар".
Бурганның Хураганы деп кымыл? Ол дээрге Иисус Христос - Бурганның Оглу-дур. А бо делегейниң улузунуң бачыды деп тура, кымнарга хамаарыштыр чугаалап турары ол? Бо делегейде кымнар чурттап турарыл? Ол дээрге сен болгаш мен база чанывыста кижилер. Бурган бо делегейниң кижилерин бачыттыг деп санап турар. Ынчангаш Бурганның Хураганы - Иисус Христос бо делегейниң улузунуң бачыдын Бодунче ап алыр дээш, кижи кылдыр төрүттүнген. Иисус кандыг чылдагаан-биле делегейниң улузунуң бачыдын Бодунче ап алыр дээш келгенил? Чүге дээрге, Дээрде Бурган Ада бо делегейде Иисуска бүзүрээн кижи бүрүзү өлбезин, харын мөңге амыдыралдыг болзун дээш, Бодунуң эр чаңгыс Оглун берипкен. Бурган Аданың бо делегейниң улузунга ынакшылы ол хире болган-дыр. (Иоанн 3:16).
Ынчангаш, Иоанн 1:12 шүлүкте: "А Ону (Иисус Христосту) хүлээп алган база Ооң (Иисус Христостуң) адынга бүзүрээн бүгү улуска Ол ( Иисус) Бурганның ажы-төлү болур эргени хайырлаан» деп бижип турар.
Аңаа бүзүрээш, Иисус Христосту хүлээп алыр болзувусса, Бурганның төлү апаар бис.
"А бачыттарывысты ажыы-биле миннир болзувусса, Бурган Бодунуң Сөзүнге шынчы база чөптүг болгаш, бачыттарывысты өршээр база кандыг-даа чөптүг эвес херектерден бисти арыглаар. А бачыт үүлгетпедивис дээр болзувусса, Бурганны "Мегечи сен" деп турарывыс ол, ындыг болганда, Ооң сөзү бисте чок-тур» (1 Ин 1:9, 10).
Бурган мынча дээн: "Мен оларның кем-буруузун өршээр мен, оларның бачыттарының дугайында оон ыңай сагынмас мен" (Иер 31:34). "Мен оларга чаңгыс аай чүректи хайырлап, оларны чаа сүлде биле үргээр мен; оларның дашталган чүрээн ап каапкаш, чымчак чүректи бээр мен" (Иез 11:19).
Бачыттарывысты Бурганга ажыы-биле миннир болзувусса, Ол бисти өршээр база кем-буруувусту оон ыңай сагынмас болгаш коптарбас. Ындыг болганда, бистиң бачыттарывысты боттарывыстың-даа, өске улустуң-даа коптарар, сайгарар эргези чок.
Эң-не кол чүүл - Иисуска бүзүрээш, Бурганывыс кылдыр хулээп алыр болзувусса, Ол мөңге чуртталганы хайырлаар!
Ынчангаш, Иисус Христос Бурганче баар чаңгыс орук - Аңаа бүзүреп, Ону хүлээп алгаш, мөңге чурттаарыңарны күзедим!
Аяс Ооржак (Ак-Довурак хоорай).
