Бурганның Ыдыктыг Сөзү - Библияны хынамчалыг өөренип, номчуурун кызып чоруур мен. Ында шупту айтырыгларга харыы бар. Бурган кижи бүрүзүнүң тус-тузунда чуртталгазын «орук» деп адап турарын сонуургап, эскердим. Шынап-ла, кижи бүрүзү амыдыралында амы-хууда оруун эртип чоруур ышкажыл. Өртемчейде чүгле ийи хевирниң оруу бар. Оларны хынамчалыг өөренип көөрүнче силерни чалап тур мен, эргим ха-дуңмам.
Ыдыктыг ырлар номунуң бирги эгезинде Давид хаанның ол оруктар дугайында ырлап чорааны ырылары кирген:
БИРГИ ОРУК:
Бузуттугларның сүмезин дыңнавайн чоруур, Бачыттыгларның үлегерин эдербес, Кочуургактар аразынче кирбес кижи амыр-чыргалдыг!
Ындыг кижи Дээрги-Чаяакчының хоойлузун дүн-хүн дивейн бодап, аңаа хандыкшып таалал алыр. Ындыг кижи суг эриинге олурткан чимизи үезинде быжар, бүрүлери катпас ыяш ышкаш болур, чүнү-даа кылганда чедиишкинни чедип алыр.
…Дээрги-Чаяакчы чөптүг-шынныг улустуң оруун билир.
Биргизи – чөптүг-шынныг кижиниң оруу. Ындыг кижи Дириг Бурганга бачыдын билингеш, Ыдыктыг Сүлдени Иисус Христостуң ады-биле хүлээп алгаш, Аңаа чагыртып чоруур. Ол кижи кандыг-даа назылыг, язы-сөөктүг, эр-даа, херээжен-даа, эртемниг-даа, эртеми чок-даа, бай-даа, ядыы-даа бооп болур.
Бурган Сөзүн шын сеткили-биле дүн-хүн дивейн өөренип, сагыырын кызып, Сөске улам хандыкшып чоруурунуң түңнелинде, ол кижи Бурганның авыралы-биле амыр-чыргалдыг.
Суг эриинде олуртуп каан ыяш өңгүр-даа, чөкпүр-даа, чараш-даа. Сугнуң аңаа четчир болганындан көрүштүг, сергек. Ооң чимизи элбек болгаш чаагай амданныг.
Ол ышкаш Бурганның Сөзүн амыдыралынга боттандырып чоруур кижи, чүнү-даа кылганда чедиишкинниг. Чедиишкинниг дээрге таныш-көрүш, хээли, чээли ажыглавайн чоруур кижи-дир. Ындыг кижиниң өөрүшкүзү ала-чайгаар арын-шырайында көстүп, хүлүмзүрүүнде чайнап чоруур. Ооң Бурган-биле харылзаазын ажыл-херээ бадыткап турар.
ИЙИГИ ОРУК
Бузуттуг улус көңгүс ындыг эвес – хатка ширбиткен бок сиген дег,
Бузуттуглар шииттирип тура, актыг үнмес, Бачыттыглар чөптүг-шынныг улус аразынга турар чер тыппас. Дээрги-Чаяакчы бузуттуг улустуң оруун узуткаар болгай. Бузуттуг дээрге-ле бачыттыг, буруулуг дээн. Оларның сүмезин дыңнап чоруурлар база кайы көвей. Бачыттыглар багай үлегерлиг. Оларның аразынче кирбезин Бурганның Сөзү сагындырып турар. Бир эвес Ооң сүмезин дыңнавас болза, ол кижиге амыр-тайбың, оожургал, ынакшыл, өөрүшкү доктаавас. Бузуттуг кижи Дээрги-Чаяакчының хоойлузун билбес болганындан ону сагывас база чедиишкин чок болур. Ынчангаш сеткилинде ыядып, човап, боду бодундан чөгенип, амыр-чыргал, оожургал көрбейн чоруур.
Бурганның Сөзү бузуттуг улустуң амыдыралын суг чок черде, чимизи үнмээн, оңа берген үнүшке дөмейлеп турар. Оларның кандыг-даа ажыл-херээ бүтпес, хатка ширбиткен бок сиген дег. Шииткелге арыг үнмес. Чөптүг-шынныг улус аразынга туруп шыдавас. Оларның оруун база Дээрги-Чаяакчы билир, бузуттуглар боттарының оруунга узуткаттырар.
Эргим өңнүк! Бир эвес сен бо хүнге чедир ийи оруктуң дугайында билбейн, дыңнавайн чораан болзуңза, амыдырал-чуртталгаңны чаартыр үе келген-дир, ындыг чаа арга сенде бар-дыр.«Бузуттуглар сүмезин дыңнап, бачыттыглар үлегерин эдерип, кочуургактар аразынче кире бердим. Амыдырал-чуртталгамда хандыкшып, таалаар хире эки чүү-даа чогулу. Куруг ховуда бүрүлери кадып, чимизи үнмээн ыяш ышкаш болу бердим, чүнү-даа кылырымга бүтпес болду. Хатка ширбиткен бок сиген дег апардым. Шииткелге актыг үнер аргам чок-тур. Бузуттуг оруумга узуткаттырар-дыр мен» - деп, ам билип, миннип тур мен.
Бурган-Адам, Сээң мурнуңга чөптүг-шынныг кижи болуксап тур мен.
Амыр-чыргалдыг, Бурган Сөзүнге хандыкшып, Оон таалал ап, чурттаксай бердим. Суг эриинде, чимизи үезинде быжар, бүрүлери катпас ыяш ышкаш болуксай бердим. Кылган ажыл-херектерим үре-түңнелдиг, чедиишкинниг болурун болгаш Сээң бээриң амыр-чыргалыңны, өөрүшкүңнү алырын күзеп тур мен. Дээрги Бурган-Адам, Иисус Христостуң ады-биле, мени өршээп көрем!
Ийи оруктуң биргизи – чөптүг-шыныг кижиниң оруун шилип алганыңар дээш байыр чедирип тур мен! Силерниң чаа орууңарның эгези ол-дур. Аас-кежиктиг болуңар!
Ирина ДАРМА.
