Айтырыг: БУРГАН КҮҮСЕТТИНМЕС ХООЙЛУЛАРНЫ ЧҮГЕ БЕРГЕНИЛ?
Бурганның хоойлулары
Кижи Бурганның хоойлуларынга чагыртып чурттаар кылдыр чаяаттынган. Кижи амытан бодунуң күзели-биле кара туразында чурттавас ужурлуг. Бурганга дыңнангыр, өөрүп-четтирген сеткилин илередип чоруур кижи аас-кежиктиг, өөрүшкүлүг чуртаар, а дыңнангыр эвес, өөрүп четтирип билбес кижи түрегделди көөр. Бурганның кижи-биле чарган дугуржулгазын езугаар кижи Ооң дүрүм-хоойлузунга чагыртыр ужурлуг, а Бурганның Бодунуң аазаашкынын күүседир.
ДҮРҮМ-ХООЙЛУЛАРНЫҢ СОРУЛГАЗЫ
Бижилгеде 10 чагыг - хоойлу-дүрүмде Бурганның аажы-чаңы, бүдүжү база Ооң үш сорулгазы көрдүнген.
Бирээде: Хоойлу-дүрүм Бурганның алыс шынын база кижи амытанның бачыттыг бүдүжүн көрүнчүкте ышкаш көргүзер. Бурган кижиден хоойлу-дүрүмнү күүседирин негээр, а кижи ону күүседип шыдавазын билингеш, Бургандан өршээл авыралды дилей бээр. (Гал 3:19-24)
Ийиде: Хоойлу-дүрүм хай-чагырга чок, каржы-дерзии чорукту доктаадыр. (Рим 13:24) Моон алгаш көөрге, хоойлулар хөй-ниити чурумну тудуп, шынның кижилерин хай-чагырга чок улустан камгалаар.
Үште: Бурганга бүзүрээннерге удуртулга бооп турар. (Ефес 2:10)
Бурган Ада төлдеринден чүнү манап турарын айтып бээр. А хоойлуларга чагыртыры Бурганга ынакшылының херечизи (Ин 14:15) - деп, Иисус өөреникчилеринге чагаан. Христианнар дүрүм-хоойлуну камгалал алыр дээш эвес, а амыдыралдың овур-хевири кылдыр күүседирлер.
Айтырыгга Раиса КЕЧИЛ харыылаан.
