Айтырыг: Бүзүрээр, бүзүревес-даа кижи дөмей өлүр болганда, Христостуң херээ чүл?
Х. Саая Шагаан-Арыг хоорай
Харыы:
Кижи бүрүзү өлүр, ол шын. А өлүрүнүң чылдагаанын биске чүгле Библия шын тайылбырлап берип болур. Баштайгы кижилерниң, Адам биле Еваның кылган бачыдының ужундан бүдүн делегей өлүмге онаашкан. Адамның соонда төрүттүнген улустан оода чаңгыс кижи бачыт кылбаан турган чүве болза, ол кижи өлбес ийик. А ындыг кижи чок, ол барымдаа(факт)-дыр.
Бачыттыг кижи - өлүмден чайлавас. «Кижи бүрүзү чүгле чаңгыс катап өлүр, а оон Бурганның шииткели болур» -- деп, Еврейлерге бижээн чагааның 9 дугаар эгезиниң 27-ги шүлүүнде бижээн.
Кичээнгейивисти үстүнде бижиттинген шүлүктүң ийиги кезээнче углап көрээлиңер: «…а ооң соонда Бурганның шииткели болур». өлүм соонда Бурганның шииткелин кым-даа, чүү-даа чайладып шыдавас. Өлүрүн кижи эндевес, сагыжы аарып эгелээр. Ынчан Бурганның шииткелинден чайлаарының оруун дилеп, мөчүзүн өрттедип чажыптарын чагыыр ийикпе, азы буддистер болза, кижиниң өске бир дириг амытанче шилчип, катап дирлип келиринге идегээр, азы хомудадып чорааны кижилеринге буруузун миннигилээр дээш, оон-даа өске.
А Бурган чаңгыс сөстүг база өскерлиш чок. Кижи бүрүзү өлүр, оон шииткел. Бурган ол шииткелге бачытка кайы-хире хөңнү чогун көргүзер. Ол ыдыктыг, хөлезиленип үнери болдунмас.
Ам мындыг айтырыг тургустунуп келир: Өлүмден чайлавас болган-дыр бис, оода-ла шииткелден чайлаар арга бар бе?
Кончуг эки айтырыг-дыр. Ындыг арга бисте бар. Ол дээш Бурганны мактап, өөрүп четтирээлиңер! Ол арга Камгалакчы Иисус Христостуң ачызы-биле болур.
Бурганның мурнунга сеткилиниң ханызындан бачыдын билинген, Иисус Христос бачыттыг кижиниң орнунга шииттирген деп бүзүрээн кижи бүрүзү шииткелден чайлаар.
«Бурганның Оглунга бүзүрээр кижи шииттирбес, а бүзүревээн кижи - эрте дээре-ле шииттирип алган болур, чүге дээрге Бурганның эр чаңгыс Оглунуң адынга бүзүревейн барган- дыр»(Ин.3:18).
А ам баштайгы айтырыыңарда «дөмей өлүр болганда» дээн бодалыңарны көрээлиңер.
«Шак ынчаар Христос база хөй улустуң бачыттарын чүктээри-биле Бодун чаңгыс катап өргүлге салган. Ол ооң соонда бачыт-биле харылзаа чокка, Ону манап турар улусту камгалаар дээш, катап база чедип кээр» (Евр. 9:28).
Бо шүлүктү сайгарып көрээлиңер.
- Христосту өлүмге чаңгыс катап берген. Ооң өлүмү - кижи бүрүзүнүң өлүмүнден ылгалдыг, кара-чаңгыс болуушкун. Чүге дээрге Ол Боду дээш эвес, а бачыттыг кижиниң орнунга өлүр дээш Бодун берген. Ол чаңгыс өлүмү-биле ыдыктыг Бурганывыстың чөптүг негелдезин хандырган. Бурган Ада Оглун өлүглерден диргискеш, «кеземче күүсеттинген» деп шынзытканы ол.
Рим 4: 24-25 деңнээлиңер.
- Хөй улустуң бачыттарын чүктээри-биле Христос Бодун өлүмче берген. Ол хөй улус дээрге кымнарыл? Ол - шупту улус эвес, а «Христостуң өлүмү дээрге, мээң бачыдым дээш төлевир-дир» деп, медереп билген, бүзүрээн кижилер-дир. Оларга онаажыр ужурлуг шииткел Христостуң кырынче чүдүрлү бергени ол. Ынчангаш ам олар Христостуң катап чедип келирин өөрүшкү-биле манап турарлар.
Христос катап чедип келир, Бодунга хамаарышкан улузун алыр дээш келир. Оларга бачыт дээш төлевир айтырыы ынчан турбас. Бир дугаар келгенде-ле Иисус Христос бачытты Бодунче алгаш, бүзүрээннерни шииткелден чайлаткаш, Ада Бурганны алдаржыдып, Ооң негелдезин хандырган. Ынчангаш ол айтырыг Христос ийи дугаар кээрге катап көдүрүлбес. Ол Бодунга хамааржыр чонну алыр дээш келир. Мурнунда көргенивис Евр. 9:27-28 шүлүктерде ийи аңгы бөлүктүң кижилери кирген. Оларның аразында дыка улуг ылгал бар. Баштайгылары үлүм соонда шииттирер, а өскелери Иисус Христос - Камгалакчызын өөрүшкү-биле манап турарлар. Хүндүлүг номчукчу, сен ол ийи бөлүктүң кайызынга бодуңну хамаарыштырып болур-дур сен? Кайызын шилиирин бодуң шиитпирлээр сен.
Айтырыгга Р.Кечил харыылаан.
