«Дээрги-Чаяакчыга ч үрээңниң ханызындан идеге, а бодуңнуң угааныңга ынанма.
Кандыг-даа оруктап чоруп орзуңза, Дээрги-Чаяакчыны билип аарын кызыт, Ол ынчан сээң орууңну дортап бээр” ( Уг. чугаалар 3 : 5-6)
Бергелерге таварышкаш бир-ле чүвеге ынанырын бодаар бис. Чамдык улус бодунуң угаанынга, бодунга ынаныр. Бүзүрелден ойталааш, бодунуң бодап турары-биле кылыр. Бодунуу-биле кылганының түңнелинде, аштырыышкынга таваржыр. Ынчангаш Бурган “Дээрги-Чаяакчыга чүрээңниң ханызындан идеге, а бодуңнуң угааныңга ынанма.” – деп өөредип турар.
“Бодуңнуң угааныңга ынанма” деп чүү дээри ол? Ол дээрге, херектиг-даа, херекчок-даа бүгү-ле чүве бүрүзүн билирин болгаш тодарадырын оралдашпа дээн-дир. Дээрлерге чеде бергижевиске чедир, бистиң-биле болуп турар дыка хөй чүүлдерни билип алыр, тодарадыр арга-шинек, угаан кижиде чок.
Төнчүзүнге четпээн шааңарда Бурганның силерни эдертип чоруп орар оруктарын шиитпеңер. Доозулбаан ажыл-херекти шүгүмчүлээн херээ чок. Шыдажыңар! Үези келирге, чүге ынчаар болуп турганынының утказын билип алыр силер. Бурган чүнү кылып турарын билир. Ол кажан-даа часпас, Ол частырыглар кылбас. Силерге чүнүң херегин Ол кончуг эки билир. Ооң планнарын силер баш бурунгаар көрүп шыдавас силер. Ол кандыг-даа болуушкуннуң түңнелин баш бурунгаар билир. А силер ону билбес силер. Түрегдел, бергелер, аарышкы, аарыг-аржык дээн ышкаш хилинчээңерге хамаарыштыр “Чүге” деп айтырыыңар бир-ле катап силерге билдинип, тодарай бээр. Ынчангаш амдыызында ботка ынанган ажыы чок. Бир-ле хүн Бурган айтып бээр деп Бурганга ынаныңар! Аңаа бүзүреңер! Силерниң Аңаа ынаныжыңар, бүзүрелиңер кезээде чайгылыш чок болур-ла болзунам!
“Дээрги-Чаяакчыны билип аарын кызыт...” хүн бүрүнүң хереглелдеринге-даа, бергелерге-даа Ону билип алырын кызыт. Авраам шак-ла ынчаар Бурганны хүндүлеп, (Быт 12 : 7; 13 : 18) каяа-даа одагланып, майгынын тиккенде, кезээде Бурганны кыйгырып, Аңаа өргүлүн салып чораан. Базым бүрүзүн Бурган удуртуп, башкарып чоруур деп силер база Авраам ышкаш бүзүреңер. Бодуңарның бурунгаар планыңарны Бурганга ынаныш-биле тургузуңар.
Хүн бүрүде амыдыралывыста кылып турар үүрмек ажылдарны Бурганның киржилгези чокка бодум кылып алыр мен деп бодунга ынаныр чорук бодун бурганчытканынга дең. Ынчангаш аргажок үүрмек деп санап турарыңар ажыл-үүлеңерни безин Бурганга чугаалап, Ооң алгап-йөрээшкинин дилеңер. Амыдыралыңарга таварышкан бергелерни Бурганга чугаалаңар! Чоок эжиңер-биле сүмележир мурнунда, Бурган-биле сүмележиңер.
Бир эвес эртениң-не чаа үнген хүнде чүнү канчаарын билбезивисти миннип, ону канчаар эрттирерин Оон айтырып, Бурганның мурнунга сөгүрүүр болзувусса, ынчан Ооң чырыы биске чырыыр.
Кандыг-даа оруктап чоруп орзуңза, ... Ол ынчан сээң орууңну дортап бээр”. Бурганның айыткан оруу-биле чоруурунга белен болуңар. Хөй катап түрегделди көрген Иов үелерни дыка үнелеп чораан. “Ынчан Ооң чырыткызы мээң кырымга чырып турган, Ооң чырыы мени дүмбей өттүр эдертип аппаар турган!” (Иов 29 : 3). Дүбмей караңгыны силер база Иов дег чырыктыг эртер силер. Бурган силерни алгап-йөрээр-ле болзунам!
Азаашкыннарыңны база авыралыңны хүннүң-не мээң амыдыралымга боттандырар бодал, күзел Сенде бар деп бүзүрээр мен. Ынчангаш Сеңээ ынаныр мен, Бурганым! Мени бот-тогдунар чоруктан камгалап көрем! Сээң чырыткың мээң кырымга чырып чоруур болзунам! Иисустуң ады-биле диледим! Ындыг-ла болзунам!
Кишинев хоорайда церковь “Живое Слово”,
пастор Игорь Опинка.
Тыва дылче Римма Ондар, Олча Ондар очулдурган.
